امبارح اجتمعنا بنقابة الصحفيين عشان توحيد اليسار، والرفاق ما صدقوا هاتك يا طحن من الساعة اتنين عصرا حتى تمانيه ونص ليلا وسط. حاله مكتومة من غضب عدد كبير من الحاضرين اللي كانوا في الجلسة الأولى حوالي 250 ونزلوا في الجلسة التانية إلى 100 وفى الاجتماع حضر عدد من المستقلين وحزب الشعب والاشتراكيين الثوريين وجزء من اليسار الديمقراطى بالاضافه للرفاق أعضاء اليسار الثوري وبعض التجمعيين، وغاب أو امتنع عن الحضور الرفاق في الحزب الشيوعي المصري والتجمع والعدالة والاشتراكيين المصريين وجزء من أعضاء اليسار الديمقراطي.
وبالرغم إن الاجتماع كان أغلبه طق حنك وطحن في الهوا وبان للجميع إن اللجنة الإدارية عندها تصور كانت عايزه تمرره لكن الزملاء الحاضرين ثاروا على هذه الطريقة حيث اخذ الرفيق أحمد سيف الكلمة وطرح تشكيل لجنة للإعداد للمؤتمر وطرح أسماء بعض الرفاق لعضوية اللجنة،والرفيق إلهامي الميرغنى رئيس الجلسة كمل الموضع وطرح سؤال "مين عايز يضيف أسماء أخرى ؟" وبدا الموضوع وكأنه قرار مش مجرد اقتراح من رفيق قابل للرفض أو التطبيق زيه زى كل اقتراحات اللي سبقوه في الكلام ،فانفجر بعض الحضور اعتراضا على هذه الطريقة،واضطر الرفيق ممدوح حبشي انه يقول " إن الكلام ده مجرد اقتراح من زميل قابل للموافقه أو الرفض " وظهر الأمر وكأن رئيس الجلسة إلتبس عليه الأمر ومخدش باله إن كان اقتراح ولا قرار ،ولما ظهر للرفيق عماد عطيه إن التوضيح السابق يمثل تجنى على الزميل اللي اقترح اللجنة والأسماء وعلى رئيس الجلسة لأنه بهذا التوضيح حملهم بقصد أو بغير قصد اعتراضات القاعة فقال في كلمته "في الحقيقة ده مش اقتراح من سيف ده اقتراح اللجنة الإدارية اللي حضرت للاجتماع " .
وفى الحقيقه كلام عماد عطيه طرح سؤال تانى"إيه اللى يخلى اللجنة الإدارية تستخدم هذا الأسلوب ،وكان من الأسهل والأفضل تطرح تصورها على الحضور في ورقه باسمها أو تاخد كلمه باسمها وتوضح من البداية إن ده اقتراحها وتوضح أسباب الاقتراح" لكن للأسف اللجنة اختارت الأسلوب اللي أثار اعتراض الحضور،وتقدم بعد ذلك الرفيق صلاح العمروسى وقال"ليه نخلى اللجنة صغيره مانوسعها ويحضر اللي عايز يحضر"،و رد الرفيق صبرى فوزى و قال" الكلام ده مش مظبوط واللى بيقول ان كل الناس تحضر يبقى مش عايز حد يحضر لانه صعب 200 واحد يتناقشوا كل مره ".
كل ده والقاعة واحدة واحدة بتفضى والرفاق بيروحوا والزملاء مش واخدين بالهم ،وفجأه الزميل وائل خليل قال نصوت لجنة واسعه أو لجنة ديئه ،وارتفعت أصوات الرفاق من حزب الشعب ومن الاشتراكيين الثوريين نصوت مين عاوز واسعه ومين عاوز ديئه ،وبدأ التصويت وسط سخريه باقي الحضور فى القاعه اللى صوتوا فى الحالتين من ناحية ،وقام زميل قال نصلى صلاة استخارة من ناحية تانية ،وبعض الرفاق حولوها لإفيه جنسى من ناحية تالته حيث صرخ أحدهم قال "احنا بتوع الديئه" وانصرف أغلب الحضور من القاعه رغم عدم انتهاء الاجتماع لانه لم يتم الاتفاق على البيان الختامى وسط نداءات الرفيق وائل خليل " لسه الاجتماع ما انتهاش لسه البيان" ولكن لم يلتفت أحد إلى نداءاته ،ورد أحد الزملاء خلى بتوع الواسعه يكتبوه ،وانتهى الاجتماع بتشكيل لجنه يزيد عدد أعضائها عن اربعون عضوا ودون الاتفاق على البيان الختامى ،ووسط سيطرة الايفيه الجنسى على الاجتماع مين واسعه ومين ديئه.
ورغم الحالة اللى انتهى عليها الاجتماع أنا لسه مافقدتش الامل ان حلم الاتحاد يتحقق لعدة أسباب:
1- ان اللجنة اللى اتشكلت لتحضير المؤتمر الاول تنجح فى تجاوز اخفاقات هذا الاجتماع وتسعى للاعداد الجيد للمؤتمر الاول.
2- ان اجتماع الامس لم يتحول إلى معركة عكس كل تخوفاتنا التى توقعها العديد منا قبل الاجتماع وهى ايجابية يجب البناء عليها.
3- نسبة الحضور من الشباب كانت مفرحه وأرجو الاهتمام بها وعقد جلسات استماع خاصة بهم والسعى لزيادة عضوية شباب آخرين وأقترح فى ذلك عقد اجتماعات مع شباب من أجل التغيير ،وشباب اليسار الديمقراطى ،ومجموعة مدينة نصر،وطلاب اليسار النشطاء فى الحركة الطلابية، والمدونين المصريين لأنهم طاقة شبابية هائلة وقوة مستقبلية يجب الاهتمام بها وإعطائها المساحة التى تستحقها.
4- نسبة الحضور من المحافظات كانت ضئيلة وأعتقد أن ذلك يرجع إلى عدم الاهتمام بعقد جلسات معهم حيث اكتفينا باعلان الدعوى على النت وبالحالة العاطفية لرحيل الاستاذ نبيل الهلالى،وأقترح على اللجنة فى هذا الشأن إعداد جداول زيارات للمحافظات تنتقل فيها اللجنة الى كل محافظة لعقد اجتماع موسع لا يقتصر على قيادات المحافظة وانما يسعى لعقد اجتماع موسع مع كل اليساريين بكل محافظة أو بكل مركز ليشعروا أننا فى حاجة ماسه لوجودهم فبدونهم لن يكون للاتحاد أى قيمة ويتحول إلى كيان قاهرى يضاف إلى الكيانات العديد ،ويجب علينا التوقف عن الاكتفاء بالتمثيل المشرف للمحافظات.
5- أدعو اللجنة المشكلة الى عقد اجتماعات جديدة مع فصائل اليسار التى امتنعت عن حضور اجتماع الامس

6- وبصرف النظر عن كل سلبيات الأمس فقد استشعرت رغبه صادقه من أغلب الحضور في اتمام حلم الاتحاد


خالد على عمر
المحامي
5 أغسطس 2006